Ալեքսանդր Գոլովին

Ալեքսանդր Յակովլևիչ Գոլովինը ծնվել է 1863-ին, Մոսկվայում: Մանկությունն անցել է Պետրովսկի-Ռազումովսկոեի հին դաստակերտում, բանաստեղծական բնության մեջ: Ուսանել է Մոսկվայի գեղանկարչության, քանդակագործության և ճարտարապետության դպրոցում:
Գոլովինը վիրտուոզ գունանկարիչ էր: Նրա կյանքի և ստեղծագործության հետազոտող Դորա Կոգանը գրել է. «Ինչպես երաժշտության մեջ կա բացարձակ լսողություն, Գոլովինի մասին կարելի է ասել, որ նա ունի գույնի բացարձակ զգացողություն»: Իր ստեղծագործություններում նկարիչն առանձնահատուկ կարևորություն է տվել գույներին, նկարել է թղթի կամ ստվարաթղթի վրա, և միայն մեծ նկարների համար է օգտագործել անհավասար հիմքով բարակ կտավ: Այդպիսի կտավի վրա է պատկերված «Ծաղկած լճակ» ստեղծագործությունը:
Կոմպոզիցիայի երկու կողմերում երկու ուղղահայաց են, որոնց միջև նկարիչի անսպառ երևակայությունը զարմանալիորեն միահյուսել է ծառերի ճյուղերն ու տերևները՝ ստեղծելով յուրօրինակ, տարօրինակ կանաչ նախշ, իսկ ներքևում, ի  հակակշիռ այդ միահյուսվածության և նախշերի, լճակի հանդարտ հայելային հարթությունն է: Գոլովինի բնանկարը գրավում և հրապուրում է դիտողին՝ նրա մեջ հարուցելով անգերազանցելի ցանկություն՝ գտնվելու այդ ծաղկած լճակի ափին, ռուսական բնության այդ դրախտային անկյունում:
Ալեքսանդր Յակովլևիչը եղել է հաստոցային նկարչության տարբեր ժանրերի վարպետ և Ռուսաստանի ամենահանրաճանաչ թատերական նկարիչներից մեկը: Նրա արվեստանոցը գտնվում էր Մարիինյան թատրոնում: Նրան անվանում էին թատրոնի մոգ, քանի որ բեմանկարչության հրաշքներ էր գործում: Ռուսական օպերայի և բալետի արտասահմանյան շրջագայությունները՝ «Ռուսական սեզոնները», որոնք կազմակերպում էր փայլուն իմպրեսարիո Սերգեյ Պավլովիչ Դյագիլևը, սկսվել են Փարիզում, 1908-ի մայիսի 6-ին, «Բորիս Գոդունով» բեմադրությամբ, Գորովինի բեմի և հագուստների ձևավորումներով: Օպերան շլացուցիչ հաջողություն ունեցավ: Դա ոչ միայն կոմպոզիտոր Մուսորգսկու և բաս Շալյապինի, այլև նկարիչ Ալեքսանդր Յակովլևիչ Գոլովինի հաղթանակն էր:
Ա. Յա. Գոլովինը Ռուսական արվեստի թանգարանում (պրոֆ. Ա. Աբրահամյանի հավաքածու)
«Մամռոտած լճակ», 1900-ական թթ.
Տղամարդու հագուստի էսքիզ Կ. Գլյուկի «Մայիս իթագուհին» հովվերգության բեմադրության համար, 1919
Ձևավորման էսքիզ Ն. Ա. Ռիմսկի-Կորսակովի «Պսկովուհին» օպերայի բեմադրության համար