Բորիս Դմիտրևիչ Գրիգորև

Բորիս Դմիտրևիչ Գրիգորևը մուտք է գործել ռուսական կերպարվեստ որպես գծի ուժեղ վարպետ և փայլուն նկարիչ, որի աշխատանքները ժամանակակիցներին զարմացրին իրենց «առասպելական ճշգրտությամբ»: 1919-ին նա ընտանիքի հետ հեռացել է Ռուսաստանից ու այլևս չի վերադարձել:
Երևանի Ռուսական արվեստի թանգարանում Բորիս Գրիգորևը ներկայացված է ռուսական ժամանակաշրջանի գործերով: «Մայրը և երեխան» նա նկարել է 1913-ին` յուղաներկով փայտի վրա: Սա նկարչի կնոջ՝ Ստրոգանովի դպրոցում նրա համադասարանցի, ազգությամբ գերմանուհի Ելիզավետա Գեորգիևնա ֆոն Բրաշեի դիմանկարն է, որը կերակրում է նորածնին:
Նկարիչը հակված էր դեպի ռոմանտիկ հեգնանքն ու գրոտեսկը, որը նրա աշխարհայացքն օժտում էր հատուկ սրությամբ: Պրոֆեսոր Աբրահամյանի հավաքածուում ներկայացված է Գրիգորևի «Գյուղական աղջիկներ» գրոտեսկային աշխատանքը:
1917 թ. ստեղծված «Կենդանաբանական այգի» նկարում մեր առջև կուրյոզային մի աշխարհ է, որտեղ մարդիկ, կենդանիները և ծառերը զարմանալիորեն նման են միմյանց՝ ձևերի և դիրքերի անշարժությամբ: Այս զարմանահրաշ վարպետի գործերի առջև ակամա հիշում ես Ալեքսանդր Բենուայի խոսքերը. «Իր  բացառիկ տաղանդավորությամբ հիանալի արվեստ»:
Բ. Դ. Գրիգորևը Ռուսական արվեստի թանգարանում (պրոֆ. Ա. Աբրահամյանի հավաքածու)
«Գեղջկուհիները», 1913 (՞)
«Մայրն ու մանչուկը»  ՊՌԹ-ում գտնվող նկարի տարբերակ, 1913
 «Կենդանաբանական այգի», 1917
«Բակ: Բնանկար կովով»