Նադեժդա Ուդալցովա

Ալեքսանդր Դրևինը և Նադեժդա Ուդալցովան ամուսնական զույգ էր, որի աշխատանքները նույնպես ներկայացված են Երևանի Ռուսական արվեստի թանգարանում:
Ուդալցովան ուսանել է Ռուսաստանում ու Փարիզում և սկսել է կուբիզմից: Դրևինն ազգությամբ լատվիացի է (իսկական անունը՝ Ալեքսանդր-Ռուդոլֆ Դրևինշ), կրել է Ռիգայի արվեստի դպրոցի ավանդույթները: 1920-ին նրանք ամուսնացել են, նրանց կյանքն ու ստեղծագործական ուղիները հատվել են, իսկ ավելի ուշ պատկերային մտածողությամբ ևս նրանք նկատելիորեն մոտեցել են միմյանց: Ամուսինները հաճախ են միասին մեկնել ստեղծագործական գործուղումների: 1920-ականներին և 1930-ականների սկզբին նրանք միասին աշխատել են նախ Ալթայում, ապա՝ Հայաստանում: Ալթայն իր արտասովոր գեղեցկությամբ բառացիորեն ցնցել է Դրևինին: Այդ մասին նա գրել է իր հուշերում:
Պրոֆեսոր Աբրահամյանի հավաքածուում Դրևինը ներկայացված է «Ալթայ. չոր կեչի», «Ալթայ. փոթորիկ տափաստանում», «Վարդագույն բնանկար սպիտակ տան հետ» նկարներով, որոնցում նկարիչը հասնում է նկարչության և գույնի անսովոր ուժեղ արտահայտչականության:
Ուդալցովան ներկայացված է հայկական շարքի մի քանի բնանկարներով և ուշ շրջանի մի նատյուրմորտով: «Հայաստան. աշխատանք խաղողի այգում» բնանկարում աշխատողների հետևի մասում ծառերը ճկվում են, իսկ երկիրն ասես պտտվում է: Երկու այլ բնանկարներում` «Հայաստան. Նորք», «Բնանկար. Հայաստան» կերպարների դերը ստանձնում են ծառերը:
Ուդալցովայի «Նատյուրմորտում» (1945) ներկայացված են ծաղիկներ, մրգեր, սպասք` դասական նատյուրմորտի ավանդական առարկաներ:
Ն.Ա. Ուդալցովը Ռուսական արվեստի թանգարանում (պրոֆ. Ա. Աբրահամյանի հավաքածու).
«Հայաստան. աշխատանք խաղողի այգում», 1933
«Բնանկար. Հայաստան», 1933
«Հայաստան. Նորք», 1934
«Նատյուրմորտ», 1945
«Ծաղիկները պատուհանին » , 1946